Maanna pisortatigoortunngortoq: Ilisimatusarfimmi inatsisilerinermik ilinniagaq eqqartuussiveqarnermut tamarmut ammaassisoq

Nunatsinni inatsisilerituunut oqaluttuarisaanermi pingaarutilimmik nutaarsiassaqarpoq: Ilisimatusarfimmi inatsisilerinermik ilinniagaq maanna - Kalaallit Nunaanni Danmarkimilu - eqqartuussisunngortitsisinnaanngorpoq, eqqartuussissuserisunngortitsisinnaallunilu unnerluussisunngortitsisinnaanngorpoq.

Danmarkimi inatsisinik atuutsitsinermut ministereqarfiup aalajangeqqammerpaa Ilisimatusarfimmi inatsisilerinermi kandidatinngorneq Danmarkimi aamma Savalimmiuni ilisimatusarfinnut nallersuunneqassasoq.

Taamaasillutik nunatsinni kandidatitut ilinniarsimasut Naalagaaffeqatigiinnitsinni suleqatitik assigalugit inatsisilerinerup iluani atorfinnut tamanut qinnuteqarsinnaanngorput.

Maannamut inatsisilerituut Danmarkimi ilinniarsimasut taamaallaat eqqartuussisunngortinneqartarsinnaasimapput, eqqartuussissuserisunngortinneqartarsinnaasimallutillu unnerluussisunngortinneqartarsimapput - aamma nunanitsinnut atuussimasumik.

Tamanna eqqartuussiveqarnerup iluani equngasortaqartitsisimavoq maanna kiisami aaqqiivigineqartumik.

Ukiorpassuarni qanimut oqaloqatigiittareernerit kingorna, tamatumani Ilisimatusarfiup Inatsisilerinermut Immikkoortortaa nunatsinni inatsisilerinermik ilinniakkap imarisaanik pitsaassusaanillu uppernarsaasareerluni, qallunaat inatsisinik atuutsitsinermut ministereqarfiata akuersinera pivoq.

Naligiissitsinermut aamma inatsisitigut isumannaatsuunermut atatillugu angusaq tamanna annertuvoq - nunatsinnilu inatsisilerinermik ilinniarfimmut alloriarneq tamanna annertuvoq.

Paasisaqarnerorusukkuit Ilisimatusarfimmi inatsisilerinermik ilinniakkamut immikkoortortaqarfimmi pisortap, Anette Storgaardip, attaviginissaanut tikilluaqqusaangaarputit.