ONKN aamma SILA suleqatigiilerput
Oceans North Kalaallit Nunaat (ONKN) aamma SILA Ilisimatusarfimmi immikkoortortaq aalisartut, piniartut nunap inoqqaavisalu ilisimasaannik/najukkami ilisimasanik Kalaallit Nunaanni biologinngortussat ilinniagaannut peqataatitsinissamik nukittorsaanissamut suleqatigiinnissamut isumaqatigiissuteqarput
ONKN-imit aningaasaliisoqarneratigut PUISI - puisi pillugu pikkorissarneq - 2026-mi piniartunik ilisimasaminnik kiisalu ilinniartitsissutinik nutaanik ikorfartuisunut suleqatigiinnissamut taartissaqartitsinissamut immikkut ukkassisumik ingerlatsisoqassaaq.
Suleqatigiinneq ilisimatusarsimanermik tunuliaquteqartumik ilisimasanik taamatullu aalisartut piniartullu ilisimasaanik kiisalu nunap inoqqaavisa ilisimasaat ataatsimoortillugit assigiimmik naleqartillugit ataqqeqatigiinnermik tunngaveqassaaq. Kalaallit biologit kinguaariit tulliuttut ilinniagaannik ilisimasatigut tunngaviit atorneqalernissaannik ilusiliinissaat siunertaavoq. Suleqatigisat akuersaarpaat, ilisimasat assigiinngitsut naligiittut aamma suleqatigiinnerisa ilisimatusarnermi aqutsinermilu nukittorsaanissamut tapertaassasut. Taamaattumik suleqatigiinneq pioqatigiinnermik siuarsaassaaq aamma ilisimasat akornanni peqataatitsissalluni aamma qanoq tamatuma ilisimasanik taamaalillunilu aalajangiinissamut tunngavissamik tamakkiinerusumik pilersitseqatigiinnissamut ilapertuutaanissaa takutinneqassalluni.
ONKN aamma SILA-ilinnniakkamut imaani pisuussutinik piujuartitsisumik aqutsineq pillugu sulianut tunngasunik saqqummiuissinermut, aqutseqatigiinnermut ilapittuisinnaavoq kiisalu ilisimatusarnermi aqutsinermilu nunap inoqqaavisa ilisimasaannik peqataatitsinermi.
2026-mi suleqatigiinneq ilinniartitaanermut taajuutilimmut “PUISI”-mut pingaarnertut sammisaqarfiussaaq, tassani puisi tunngavigineqassalluni. Ilinniartitsinermi ilaatigut issittumi nunap inoqqaavisa puisimik atuinerat taamatuttaaq ilisimatusarneq pillugu oqallittoqartassaaq. Tamatuma saniatigut suliaqarfinni piniartut peqatigalugit suliaqarnermi puisinniarneq, pissutsit silamut sikunullu tunngasut, ukiup nikerartarnera, uumasoqatigiinnik ilisimasaqarneq aamma isumannaatsuuneq sammineqartassapput. Suleqatigiinnermi aamma imaani miluumasut timaasa sannaasa ilusaannik ilinniarnissamut ilinniartut periarfissaqassapput tassani nunap inoqqaavisa ilisimariigaat ilaatinneqassallutik kiisalu puisip amiata kulturikkut aningaasaqarnikkullu pingaaruteqassusaa ilanngullugu.
ONKN-ittaaq nunap inoqqaavisa najukkamik tunngaveqartumik nakkutilliisarnermi aqutsinermi, aqutseqatigiittarnermi peqataatitsinermi suliaqarnermut misilittakkanik ilisimasanillu tunniussisassapput, ilisimasat amerlasuut tunngavigalugit aqutsinissamut pilersaarutinik ineriartortitsinermut kiisalu nunap inoqqaavisa ilisimasaannik suliaqarnermut ileqqorissaarnikkut malittarisassaliornermut ilapittuissapput.
Suleqatigiinneq aqqutigalugu ilinniartut ukununnga piginnaasanik ineriartortitsissapput:
● Ilisimasanik assigiinngitsunik akuersaarneq ataqqinninnerlu
● Aalisartunik, piniartunik aamma najukkami inuiaqatigiinnik ileqqorissaartumik ataqqinnittumillu suleqatigiinneq
● Ilisimatuussutsikkut ilisimatusarnermi ilisimasanik assigiinngitsunik akulerutsitsinermik
● Peqataatitsinermik aamma suleqatigiinnermik tunngaveqartumik periutsinik atuineq
● Ilisimasat amerlasuut tunngavigalugit aqutseqatigiinnermut ikorfartuineq
FACEBOOK
LINKEDIN
Assiliuk - linki
