Ilisimatusarnermi nangeqattaartuliat nutaat: Gerningsstedet Grønland

Kalaallit Nunaannut atatillugu - qanga nalitsinnilu immitsinnillu oqaluttuarisarnitsinni - pinerluttuliortarneq qanoq paasisarparput?

Apeqqut taanna ukioq manna Ilisimatusarfiup saqqummersitaani Grønlandsk Kultur- og Samfundsforskning 2026-imi - Annemette Hejlstedimit aallaqqaasiutitut oqaaseqarfigineqartumi - pingaarutilittut qitiutinneqarpoq.

Ukiup ataatsip ingerlanerani allaaserisat ataatsimut sammisatut nangeqattaartumi Gerningsstedet Grønland - fiktion og virkelighed-imi saqqummersinneqartassapput. Tassani ilisimatusarnermit ilanngussat, tassa suliassaqarfinni assigiinngitsuneersut pinerluttuliortarnermik, eqqartuussisarnermut paasinninnernik oqaluttuanillu isiginnittaatitsinnik ilusilersueqataasartunik misissuinernik imaqartut, katersorneqassapput.

Nangeqattaartumi sammisat siammasipput. Oqaluttuarisaanermi ileqqunik aamma nunasiaataanerup siornanit ullumikkumut naapertuilluartarneq, Kalaallit Nunaallu filmini tv-milu qanoq saqqummiunneqartarnera sammineqassapput. Ilaatigut eqqartuussisoqarnerup oqaluttuarisaanera, inuiaqatigiilerineq, atuakkialerineq tusagassiuutilerinerlu allaaserisatut ilaassapput - tamarmillu pinerluttarnermi piviusut aamma oqaluttualiat assigiinngisitaartumik pullavigissavaat.

Sammisaq Ilisimatusarfiup ilisimatusaqatigiivinit Issittumi pinerluttuliortarnermit aallarnerneqarsimavoq, ilisimatusaqatigiit 2021-miilli apeqqutit taakkua nunatsinnut sammivilerlugit misissuinermik aallussaqarsimapput.

Maannangaaq allaatigisat siulliit ukua atuarsinnaavatit:

• Retsbevidsthed og social normering i Grønland før den europæiske kolonisation uannga Morten Nornild

• Tracing crime in Greenland-set feature films and TV series uannga Anders Grønlund

Ukiup ingerlanerani allaaserisat allat saqqummersinneqarumaarput - tamarmillu inuiaqatigiinni aamma oqaluttuani pinerluttuliortarnerup ullumikkut atuuffia eqqarsaatissarsinartumik pullavigissavaat.

Grønlandsk Kultur- og Samfundsforskning 2026-p quppernera maannangaaq alakkaruk saqqummersitallu atuakkit.