Pride

Ilisimatusarfimmi ilinniartut sulisullu tamarmik ilinniartitaanermut, ilisimatusarnermut ilisimatusarfimmilu peqatigiinnermut assigiimmik periarfissaqarnissaat pingaaruteqarpoq, tassanilu suiaassuseq, suiaassutsikkut kinaassuseq, kajungissuseq, tunuliaqut imaluunniit inuunermi inissisimaffik apeqqutaatinneqassanngillat.

Ilisimatusarfik piffiussaaq inuit ataqqeqatigiillutik, alapernaassuseqarlutik akuersaarlutillu naapiffigisinnaasaat. Sammiviliinerillu assigiinngitsut akuerineqaannaratik ilisimasanulli nutaamik, peqatigiinnernut nukittunerusunut immitsinnullu paasinninnerunissamut tapersiissapput.

Nunatsinni ilisimatusarfittut Inunnit aqunneqartutut aamma ilinniartoqarfittut ilisimatusarnerullu iluani qaffasinnerpaatut inissisimaffilittut inuiaqatigiit tamakkiisumik pillugit ilisimasanik pilersitsinissamut - aamma Kalaallit Nunaanni misilittakkanut, nipinut inooriaatsinullu amerlasuunut inissaqartitsinissamut immikkut ittumik akisussaaffeqarpugut.

Nunarput eqqarsaatigissagaanni assigiinngiiaassuseq nutaatut takornartatulluunniit taaguutaanngilaq. Paarlattuali piviusuuvoq. Inuit kinaassutsitik inuunerminni assigiinngitsutigut takutittuarsimagaat, assigiinngiiaassutsimullu inissaqartitsigaanni peqatigiinnerit nukittunerulersartut oqaluttuarisaanitta piorsarsimassutsittalu ersersippaat.

Naleqartitat taakku ukkatarineqarnissaannut aamma inuit, peqatigiinnerit kattuffiillu paasinninnerulertoqarnissaa, ataqqeqatigiinnerulertoqarnissaa naligiimmillu periarfissaqartoqarnissaa pillugit sulisut nersornissaannut Pride periarfissiivoq. Tamanna ilutigalugu Pride-p eqqaasippaatigut akuutitsineq ullormi aalajangersimasumi qaammammiluunniit aalajangersimasumi taamaallaat pineq ajortoq. Ukioq tamakkerlugu tamanna ataatsimut akisussaaffeqarfigaarput.

Assigiinngiiaassuseq eqqarsaatigalugu eqimattat ataasiakkaat salliullugit erseqqissarneqarnissaannut Ilisimatusarfimmi tunngatinneqanngilaq. Inuilli tamarmik takuneqartutut, tusaaneqartutut ersersinneqartutullu misiginissaasa aamma kikkulluunniit peqataanissaminnut, tapersiinissaminnut atugarissaarnissaminnullu periarfissaqarnissaasa, aamma kikkulluunniit inuiaqatitsinni peqataanissaminnut tapersiinissaminnullu periarfissaqarnissaasa qulakkeerneqarnissaat pineqarpoq.

Ilisimatusarfik inuiaqatigiillu nukittuumik inissisimaffillit toqqammavigisaat tassaavoq assigiinngiiaassutsimut inissaqartitsineq aamma peqatigiinnernut kikkunnut tamanut inissaqartitsineq. Kinaassutsit inissaqartinneqaraangata peqatigiinneq pisuunnguallattarpoq - inuillu amerlanerit siunissatsinnik ilusilersueqataalersinnaasarput.

Inussiarnersumik inuulluaqqusillunga,

Mari Kleist, rektori