Nunatsinni ilinniartitaanerup iluani unammillernartut suleqatitsinnit ukkatarineqartut

Ilinniagaqassutsip appasinnera qanoq sunniuteqartarpa - ineriartornerullu tamatuma allanngortinnissaanut suut pisariaqartinneqarpat?

Suleqatitta Mîtdlârak Lennertip podcastimi Koldfronten - Kampen om Grønland og Arktisimi pulaarnerani apeqqutit taakkua ilaatigut qitiutinneqarput.

Podcastimi tassani nangeqattaartut qulingiluaanni Kalaallit Nunaanni ilinniartitaanerup iluani unammillernartut peqqutaasa itinerusumik tunuliaqutaat pillugit suleqatitta Martin Breum, tusagassiortoq atuakkiortorlu, oqaloqatigaa.

Oqaloqatigiinnerminni oqaatsit, nunarsuarmi sumiiffiup aamma oqaluttuarisaanikkut pissutsit qanoq pingaaruteqartiginersut - aamma qaffasissumik ilinniarsimasunik amigaateqarnerup inuiaqatigiit ineriartorneranut aammattaaq assigiinngissutsit piitsuussutsillu annikillisinneqarsinnaanerinut qanoq sunniuteqartarnersut ilaatigut eqqartorpaat.

Inuiaqatigiilerinermik, Aningaasaqarnermik Tusagassiornermillu Ilisimatusarfimmi adjunktitut aamma nunatta ilinniartitaanermut siunnersuisoqatigiivisa siulittaasuattut Mîtdlârak ilisimasaminik ilisimatusarnermit tunngavilinnik aamma suliaqarnerminit paasisimasaqassutsimik tapersiivoq.

Ilinniartitaanermi piginnaasat kisiisa apeqqutaatinneqarneq ajortut, aammattaarli siunissaq eqqarsaatigalugu nunatta oqartussaaffeqarnerulernissaa piujuartuunerulernissaalu apeqqutaatinneqartartut Mîtdlâqqap tikkuarpaa.

Inuiaqatigiit pillugit apeqqutini qitiutinneqartuni tamat oqallinnerisa Ilisimatusarfimmi ilisimatusartunit qanoq pitsanngorsaavigeqataasarnerinut podcastimi pulaarneq assersuutit ilagaat.