Mitdlarak Lennert Ilisimatusarfimmi prorektorinngussaaq

Oktobarip aallaqqaataani Ilisimatusarfik nutaamik prorektorertaassaaq. Ilisimatusarfimmi ilisarisimalluarneqareersup Mitdlarak Lennertip innersuussutigineqarnera siulersuisut akueraat.

Mitdlarak Lennert Issittumi Inuiaqatigiilerinermik Aningaasaqarnermillu Ilisimatusarnermut Immikkoortortaqarfimmi adjunktiuvoq, 2021-miillu Ilisimatusarfimmi ph.d.-nngoreernerminit ilisimatusarnermut, ilinniartitsinermut Ilisimatusarfimmilu ilinniakkanik ineriartortitsinermut tapersiisarsimavoq. Ilisimatusarfimmi suliassaqarfiit avatangiisaat inuiaqativullu pillugit ilisimasaqarluarluni atorfittaamini periusissiornermi suliatigullu piginnaasani atorluassavai.

Mitdlarap prorektorinngornissaminut ikaarsaarnermini semesterimi uani Issittumi Inuiaqatigiilerinermik Aningaasaqarnermillu Ilisimatusarnermut Immikkoortortaqarfimmi suliassani ilinniartitsinermut pisussaaffinnullu allanut tunngasut suli isumagalugillu naammassissavai.

Rektorip Mari Kleistip atorfinitsitsineq nuannaarutigaa:

"Midtlarak Lennert pikkorissuullunilu siumut isiginneriaaseqartuuvoq, suliatigut nukittuumik piginnaasaqarpoq Ilisimatusarfillu ilisimasaqarluarfigaa. Ataqatigiittuartitserusuttuullunilu nutaanngorsaarusuttuuvoq, Ilisimatusarfiullu ilinniartunut, sulisunut inuiaqatitsinnullu iluaqutaasumik inerisarneqartuarnera pillugu suleqatigilernissaanut qilanaarpugut".

Mitdlarak Lennertip atorfinitsinneqarnera ilutigalugu Ilisimatusarfiup pikkorissuutiminik ineriartortitserusunneranut ilisimatusarfiullu nunatsinni pingaaruteqassusaanik nukittorsaanermut anguniagaanik aammattaaq ersersitsisuuvoq. Ilisimatusarfimmi suliatigut avatangiisinik siunissamilu periarfissanik isiginninniarnikkut ilisimasanik nutaanik pilersitsinissamut, kinguaariinnik nutaanik ilinniagaqartitsinissamut inuiaqatitsinnillu eqeersimaartumik ineriartortitseqataanissamut suliatta nanginnissaat qilanaaraarput.

Ilisimatusarfiup Midtlarap atorfittaavanut tikilluaqqunissaa qilanaaralugulu atorfinitsinneqarnerani pilluaqqungaarpaa.