Ph.d.-nngortut arfineq-marluk Ukiumoortumik Nalliuttorsiornermi nersornaasigaasut
Ilisimatusarfimmi tallimanngormat Ukiumoortumik Nalliuttorsiornermi ilaatigut suliffinni avatangiisit, atuarfiit, qimuttoqarnermut kulturi, peqqinnissaq angerlarsimaffeqannginnerlu pillugit ilisimatusarnerit qitiutinneqarput
Tallimanngormat septembarip 25-ani 2026 Ilisimatusarfik ileqquusumik Ukiumoortumik Nalliuttorsiorpoq, tassanilu erinarsoqatigiittoqarpoq, ph.d.-nngortunut uppernarsaatit tunniunneqarlutillu ukioq manna sulisutsialammut nersornaasititsisoqarpoq.
Nalliuttorsiornermi nuannersut ilaat tassaavoq ph.d.-nngortunut arfineq-marlunnut allagartartaartitsineq, taakkua ilisimatusarnerat apeqqutinut inuiaqatigiinnut, kulturimut ilinniartitaanermullu tunngasunut ilisimasanik nutaanik tapersiipput:
Kalaallit qimuttuat, qimmeq, nunatsinnilu piorsarsimassutsikkut kingornussarsiatut tigussaanngitsutut ilaanera qanoq isumaqarnersoq suliniummi misissorneqarput. Qimmeq pillugu ilisimasat, ileqqutoqqat periutsillu qanoq attanneqarnersut ingerlateqqinneqartarnersullu kiisalu oqaluttuarisaanermi ullumikkullu qimuttup piorsarsimassutsimut inuiaqatigiinnullu atatillugu qanoq atuuffeqarnersoq qaammarsaavigineqarput. Ilaatigut silap pissusiata allanngoriartornera nalitsinnilu angallaseriaatsit qimuttoqarnermut kulturip piuinnarnissaanut qanoq sunniuteqarnersut suliniummi aammattaaq misissorneqarput.
Danmarkimi kalaallit angerlarsimaffeqanngitsut, tamatumani aaqqissuussaanikkut akimmiffiit angerlarsimaffeeruttoqarnissaanut ulorianartorsiortitsisut qitiutillugit, suliniummi misissorneqarput. Pissutsit inuiaqatigiinnut tunngasut aaqqissuussaanermilu unamminartut Danmarkimi kalaallit inissisimaffiinut sunniuteqartitsisartut qaammarsaavigineqarput. Naalagaaffeqatigiinnerup iluani isumaginninnermi maannamut ersinngingajattumik ajornartorsiutaasimasoq pillugu suliniut taamaasilluni ilisimasanik nutaanik tapersiivoq.
Kalaallit qallunaallu timaat issimut qanoq qisuariartarnersut, tamatumani orsup ipiutaasartaa kajortoq timimik kissartitsisartoq qanoq aallartinneqartarnersoq immikkut qitiutillugu, suliniummi misissorneqarput. Timip inuussutissanik suliarinnittarnera, hormonit qisuariartarnerat aamma orsup ipiutaasartaata kajortup assigiinngissutaat ilaatigut misissorneqarput. Inuit timaasa issimut tulluarsartarnerannik paasinninnermut inernerit tapersiipput, siunissamilu nerisanik arrorsaanermi peqqissuseq pillugu ilisimatusarnermi pingaarutilittut ilaasinnaallutik.
Nunatsinni atuartut atuarfik pillugu misigisaat aamma perorsaanermi atuartitseriaatsinilu pissutsit ulluinnarni meeqqat atuarfianni sunniuteqartitsisartut suliniummi misissorneqarput. Atuartitsineq, atuarfiup aamma atuartut ulluinnarni inuunerisa ataqatigiinnerat kiisalu atuarfik ataatsimut ilikkariartorfiuneranut tunngasut ilaatigut paasissutissiarineqarput. Maannakkut atuartitseriaatsini unamminartut assigiinngitsut suliniummi suussuserneqarlutillu atuartut ilikkariartornerisa atuarfillu pillugu misigisaat qanoq nukittorsaavigineqarsinnaanersut siunnersuusiarineqarput.
Nunatsinni atuartut nukarliit kalaallisut oqaatsinik qanoq paasiuminarsaasarnerat, pingaartumik allannermi uiguutilerinermilu periutsit ukkatarineratigut, suliniummi misissorneqarput. Atuarnermut ilinniartitsinerup, kalaallisut oqaatsit sannaanik immikkuullarissunik pingaartitsisumik, qanoq aaqqissuunneqarsinnaanera aammattaaq misissorneqarpoq. Suliniummi ilaatigut ersersinneqarpoq uiguutinik eqqumaffiginninneq atuartitsinermilu ilikkarsaanissamut toraagalimmik sammisaqartitsinerit pingaartinneruneqarpata atuartut atuarsinnaanerminnut ineriartornerat nukittorsaavigineqarsinnaasoq.
Nunarsuaq tamakkerlugu tunillaassuuttoqarnerani Kalaallit Nunaanni COVID -19-ip ingerlaarneranut tunngasut assigiinngitsut suliniummi misissorneqarput, tamatumunnga ilanngullugit napparsimanermit nanertuutinut, kingunerluutinut aamma soorlu angalanissamut killilersuinerup akiuussutissamillu kapoorinerup qitiusumik iliuuseqarfigineqarnerisa sunniutaannut tunngasut. Nunarsuarlu tamakkerlugu nappaatip tuniluuttup anersaartuutitigut aseruuttoornernut allanut sunniuteqarnera paasissutissiarineqarportaaq. Kalaallit Nunaanni Issittumilu sumiiffinni allani siunissami tunillaassuuttunik nappaatinut peqqissutsillu iluani ajornartoornernut qanoq piareersartoqarsinnaaneranut suliniummi inernerit paasissutissiipput.
Suliffinni avatangiisit suliffimmilu avatangiisit pillugit inatsit nunatsinni suliffinni qanoq isumagineqartarnersut suliniummi misissorneqarput. Pissutsit suliffinni avatangiisit pillugit suliaqarnermi siuarsaasut akornutaasullu suussuserneqarput, tamatumunnga ilanngullugit oqaatsinut, kulturimut aaqqissugaanermullu tunngasut. Suliffimmi avatangiisit pillugit aaqqissuussiniutit nunatsinni pissutsinut pitsaanerusumik tulluarsarneqarnerunissaannut kiisalu suliassaqarfiup iluani najugaqarfimmi piginnaanilinnik ilinniartitaanermillu nukittunerusunik pisariaqartitsisoqarnera suliniummi ersersinneqarput.
"Ph.d.-tut suliniutit arfineq-marluk taakkua ilisimatusarnerit Ilisimatusarfimmit nunatsinniillu aallaaveqartut siammasissusaat naleqquttuunerallu ersersippaat - ilisimatusarnerillu sammisanut inuiaqatitsinnut pingaaruteqaqisunut ilisimasanik nutaanik tapersiipput", rektori Mari Kleist taama oqarpoq.
Ukioq manna sulisutsialammut nersornaat
Ukiumoortumik Nalliuttorsiornermi SILA-mut Immikkoortortaqarfimmeersut Sofie Abelsen aamma Aviâja Lyberth Hauptmann kiisalu Ilinniartunik Sullissivimmeersoq Gerth Lynge aammattaaq ukioq manna sulisutsialattut nersornaasigaapput.
Nersornaat Sofiep, Aviâjap Gerthillu Ilisimatusarfimmut immikkut suliniuteqarnerannut suliassaqarfimmilu aamma suleqatitut peqatigiitsitsinerannut, ilisimatusarfimmik ineriartortitsinermut ullut tamaasa tapersiisarnerinut nersorinninneruvoq.
"Sulisutsialammut nersornaasiuttakkap malunnartumik allanngueqataasumik suliniarsimanerup nersornaaserneqarnissaanut pingaarutilimmik periarfissippaatigut. Sofie, Aviâja Gerthilu tunniusimangaarlutik Ilisimatusarfimmut ataatsimullu atuuffitsinnut pingaartumik tapersiisimapput", rektori Mari Kleist oqarpoq.
Ukiumoortumik Nalliuttorsiorneq ilasseqatigiinnermik naggaserneqarpoq, tassani ulloq taanna ilisimatusarnerup silarsuaani angusat immikkullu suliniuteqarsimanerit nalliuttorsiutigineqarput.
FACEBOOK
LINKEDIN
Assiliuk - linki
